News >> മാധ്യമപ്രവര്‍ത്തകര്‍ ദൈവത്തിന്റെ സവിശേഷകൃപ ലഭിച്ചവര്‍: ഡോ. തെക്കത്തെച്ചേരില്‍
കൊച്ചി: ദൈവത്തിന്റെ സവിശേഷമായ കൃപകള്‍ ലഭിച്ചിട്ടുള്ളവരാണു മാധ്യമപ്രവര്‍ത്തകരും എഴുത്തുകാരും കലാകാരന്മാരുമെന്നു കെസിബിസി മീഡിയാകമ്മീഷന്‍ ചെയര്‍മാന്‍ ബിഷപ് ഡോ. സെബാസ്റ്യന്‍ തെക്കത്തെച്ചേരില്‍ പറഞ്ഞു. മീഡിയ കമ്മീഷന്‍ പാലാരിവട്ടം പിഒസിയില്‍ നടത്തിയ മാധ്യമപ്രവര്‍ത്തകരുടെയും എഴുത്തുകാരുടെയും കലാകാരന്മാരുടെയും സംഗമം ഉദ്ഘാടനം ചെയ്യുകയായിരുന്നു അദ്ദേഹം.
സമൂഹത്തിനു ദിശാബോധവും ദര്‍ശനങ്ങളുടെ വെളിച്ചവും പൊതുമണ്ഡലത്തില്‍ ആശയരൂപീകരണവും പകര്‍ന്നു നല്‍കുന്നവരാണ് എഴുത്തുകാര്‍. തങ്ങള്‍ക്കു ലഭിച്ചിട്ടുള്ള സിദ്ധി ദൈവനിയോഗമായി തിരിച്ചറിഞ്ഞ്, പൊതുസമൂഹത്തിന്റെ ബൌദ്ധിക, സര്‍ഗാത്മക രംഗങ്ങളില്‍ ഗുണപരമായ ഇടപെടല്‍ നടത്താന്‍ കലാകാരന്മാര്‍ക്കും എഴുത്തുകാര്‍ക്കും സാധിക്കണം.
സഭ മാധ്യമപ്രവര്‍ത്തകരെയും കലാകാരന്മാരെയും എഴുത്തുകാരെയും വലിയ ആദരവോടെയും പ്രതീക്ഷയോടെയുമാണു കാണുന്നതെന്നും ബിഷപ് പറഞ്ഞു.
മീഡിയ കമ്മീഷന്‍ വൈസ് ചെയര്‍മാന്മാരായ ബിഷപ് ജോസഫ് മാര്‍ തോമസ്, ബിഷപ് മാര്‍ ജോസ് പുത്തന്‍വീട്ടില്‍, കെസിബിസി ഡപ്യൂട്ടി സെക്രട്ടറി റവ. ഡോ. വര്‍ഗീസ് വള്ളിക്കാട്ട്, റവ.ഡോ.പോള്‍ തേലക്കാട്ട്, ഡോ. കുര്യാസ് കുമ്പളക്കുഴി, സിജോ പൈനാടത്ത് എന്നിവര്‍ പ്രസംഗിച്ചു. പരിപാടിക്കു മുന്നോടിയായി രൂപതകളിലെ മീഡിയ ഡയറക്ടര്‍മാരുടെയും യോഗം നടത്തി.
Source: Deepika
