News >> Sr. Dr. മേരി ലിറ്റി(LSDP)ക്കു പുരസ്കാരം.
കൊച്ചി: സമര്‍പ്പിത വര്‍ഷത്തില്‍ മികച്ച ജീവകാരുണ്യ പ്രവര്‍ത്തനങ്ങള്‍ക്കായുള്ള അംഗീകാരമായി സീറോ മലബാര്‍ റിസര്‍ച്ച് സെന്‍ററിന്‍റെ അഞ്ചാമത്തെ പുരസ്കാരം സിസ്റ്റര്‍ മേരി ലിറ്റിക്ക് നല്‍കി. മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി പ്രശസ്തിപത്രവും ഫലകവും 25,000 രൂപ കാഷ് അവാര്‍ഡും നല്‍കി. ബുദ്ധിപരമായും ശാരീരികമായും വെല്ലുവിളികളെ നേരിടുന്നവര്‍, തളര്‍വാത രോഗികള്‍, അപസ്മാര രോഗികള്‍ എന്നിവരുടെ ശുശ്രൂഷയ്ക്കായി സ്വയം സമര്‍പ്പിച്ച സിസ്റ്റര്‍ ഡോ. മേരി ലിറ്റി ഈശോയുടെ കാരുണ്യമുഖമായി സമൂഹത്തിന് ഉത്തമ മാതൃകയാകുന്നുവെന്ന് എല്‍ആര്‍സി ചെയര്‍മാന്‍ ബിഷപ് മാര്‍ പോളി കണ്ണൂക്കാടന്‍ അനുമോദന സന്ദേശത്തില്‍ പറഞ്ഞു. പൗരസ്ത്യവും ഭാരതീയവുമായ ക്രൈസ്തവ പൈതൃക പരിപോഷണാര്‍ഥം ദൈവശാസ്ത്രം, ആരാധനക്രമം, ആധ്യാത്മികത, ചരിത്രം, ശിക്ഷണക്രമം, സാഹിത്യം, കല, സാംസ്കാരികം തുടങ്ങിയ മേഖലകളില്‍ ശ്രദ്ധേയമായ സംഭാവനകള്‍ നല്‍കുന്ന സീറോ മലബാര്‍ സഭാംഗത്തിനായിട്ടാണ് പരേതനായ ഇട്ടൂപ്പ് ഇടക്കളത്തൂരിന്‍റെ സ്മരണയ്ക്കായി ഈ അ വാര്‍ഡ് ഏര്‍പ്പെടുത്തിയിരിക്കുന്നത്. Source: SMCIM
