News >> ഒരു ടീമിന്റെ വിജയം ആ ടീമിന്റെ നല്ല മൂല്യങ്ങൾ: ഫ്രാൻസിസ് മാർപാപ്പ
വത്തിക്കാൻ: ഒരു ടീമിന്റെ വിജയമെന്നത് സ്വരചേർച്ച, വിശ്വസ്തത, സൗഹൃദത്തിനും സംവാദത്തിനുമുള്ള കഴിവ്, ഐക്യദാർഢ്യം തുടങ്ങിയ മാനുഷിക സ്വഭാവഗുണ വിശേഷങ്ങളാണെന്ന് ഫ്രാൻസിസ് മാർപാപ്പ.വത്തിക്കാനിലെ ക്ലമന്റൈൻ ഹാളിലേക്ക് സ്വാഗതം ചെയ്യപ്പെട്ട യുവെന്റസ്, മിലാൻ എന്നീ ഇറ്റാലിയൻ ഫുട്‌ബോൾ ക്ലബുകളിലെ കളിക്കാരോടും നാഷണൽ ലീഗ് സീരീസ് എ-യുടെ മാേനജർമാർ, സാങ്കേതിക വിദഗ്ധർ, പ്രതിനിധികൾ എന്നിവരോടെല്ലാം സംസാരിക്കുകയായിരുന്നു മാർപാപ്പ.ആത്മീയമൂല്യങ്ങളാണ് കായികമൂല്യങ്ങളുടെയും അടിസ്ഥാനം. ഈ ധാർമിക ഗുണസവിശേഷതകളിലൂടെ, നിഷേധാത്മകമായ ഭാവങ്ങളാൽപോലും ശ്രദ്ധേയമായ കായികലോകത്തിന്റെ യഥാർത്ഥ ഉദ്ദേശ്യങ്ങൾ ഉയർത്തിക്കാട്ടുവാൻ സാധിക്കും. നിങ്ങളോരോരുത്തരും ഒരു ഫുട്‌ബോൾ കളിക്കാരൻ ആകുന്നതിനുമുമ്പ് ഒരു നല്ല മനസാക്ഷിയുളള ഒരു സാദാ വ്യക്തിയായിരുന്നു. ഈ മനഃസാക്ഷി ദൈവവുമായുള്ള ബന്ധത്താൽ എപ്പോഴും പ്രകാശിതമായിരിക്കട്ടെയെന്ന് ഞാൻ പ്രത്യാശിക്കുന്നു. അതിനാൽ പരസ്പര ബഹുമാനം, ധാരണ, ക്ഷമ തുടങ്ങിയവയൊന്നും നിങ്ങളിൽ കുറയാതിരിക്കട്ടെ. നിങ്ങളിലെ മനുഷ്യവ്യക്തി നിങ്ങളിലെ കായികതാരവുമായി എപ്പോഴും സ്വരചേർച്ചയിലാണെന്ന് ഉറപ്പുവരുത്തണം. പാപ്പ പറഞ്ഞു.മനുഷ്യനും കളിക്കാരനുമായുള്ള ഈ സമതുലിതാവസ്ഥ കണ്ടെത്തുവാൻ തുടക്കക്കാരന്റെ മനോഭാവത്തിലേക്ക് മടങ്ങിവരുന്നത് എപ്പോഴും നല്ലതാണ്. ഒരു വിനോദപ്രേമിയുടെ കാഴ്ചപ്പാട് ടീമിന്റെ അടിസ്ഥാനമാണ്. ഇതിൽനിന്നാണ് ടീം രൂപമെടുക്കുന്നത്. ഇതിലേക്കുള്ള മടക്കം, മനുഷ്യവ്യക്തിയും കളിക്കാരനുമായുള്ള സ്വരചേർച്ചയെ പരിപോഷിപ്പിക്കുന്നു. കളിയിൽ വിജയിയാവുക; എന്നാൽ എല്ലാറ്റിനുമുപരി ജീവിതത്തിൽ വിജയിയാവുക എന്നാണർത്ഥം. സത്യസന്ധമായ കളിയെ വിശേഷിപ്പിക്കുന്ന മൂല്യങ്ങളുടെ സാക്ഷ്യത്തിലൂടെ എപ്പോഴും നല്ലതും മനോഹരവുമായവയെ യഥാർത്ഥത്തിൽ ഉയർത്തിക്കാട്ടുന്നു. സമതുലിതാവസ്ഥയുടെ പ്രശാന്തതയോടെ നിങ്ങളുടെ ആരാധകരോട് നിങ്ങൾ ജീവിതത്തിൽ അഭിലഷിക്കുന്ന ധാർമികവും ആത്മീയവുമായ തത്വങ്ങളെ പരസ്യമായി പ്രഖ്യാപിക്കുവാൻ ഭയപ്പെടരുത്. മാർപാപ്പ വ്യക്തമാക്കി.Source: Sunday Shalom
