News >> മാര്‍ ജോസഫ് കൊടകല്ലിലിന്റെ മെത്രാഭിഷേകം ഇന്ന്(15/09/2015)
സത്നായുടെ മൂന്നാമത്തെ മെത്രാനായി മാര്‍ ജോസഫ് കൊടകല്ലില്‍ ഇന്ന് അഭിഷിക്തനാകും. സീറോ മലബാര്‍ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരിയുടെ മുഖ്യകാര്‍മികത്വത്തില്‍ സത്നായിലെ സെന്റ് വിന്‍സെന്റ് കത്തീഡ്രലില്‍ രാവിലെ 9.30ന് ശുശ്രൂഷകള്‍ ആരംഭിക്കും.
പ്രദക്ഷിണമായി അള്‍ത്താരയിലേക്കെത്തുന്ന മെത്രാന്മാരെയും ശുശ്രൂഷകളില്‍ പങ്കെടുക്കാനെത്തുന്ന വൈദികരെയും സന്യസ്തരെയും വിശ്വാസികളെയും രൂപത അഡ്മിനിസ്ട്രേറ്റര്‍ ഫാ. ജോര്‍ജ് മംഗലംപിള്ളി സ്വാഗതം ചെയ്യും. മെത്രാഭിഷേക, സ്ഥാനാരോഹണ ശുശ്രൂഷകളില്‍ ഭോപ്പാല്‍ ആര്‍ച്ച്ബിഷപ് ഡോ.ലിയോ കൊര്‍ണേലിയോ, സത്നായുടെ മുന്‍ മെത്രാന്‍ മാര്‍ മാത്യു വാണിയക്കിഴക്കേല്‍ എന്നിവര്‍ സഹകാര്‍മികരാകും. പുതിയ മെത്രാന്റെ മുഖ്യകാര്‍മികത്വത്തിലുള്ള ദിവ്യബലിയില്‍ നാഗ്പൂര്‍ ആര്‍ച്ച്ബിഷപ് ഡോ.ഏബ്രഹാം വിരുതുകുളങ്ങര സന്ദേശം നല്‍കും.
ഉച്ചകഴിഞ്ഞു രണ്ടിനു നടക്കുന്ന പൊതുസമ്മേളനത്തില്‍ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി അധ്യക്ഷത വഹിക്കും. കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍, ബിഷപ് എമരിറ്റസ് മാര്‍ മാത്യു വാണിയക്കിഴക്കേല്‍, ജബല്‍പുര്‍ ബിഷപ് ഡോ.ജെറാള്‍ഡ് അല്‍മിഡ, വിന്‍സെന്‍ഷ്യന്‍ സഭ അസിസ്റന്റ് ജനറല്‍ ഫാ. മാത്യു വട്ടക്കുഴി, ഡല്‍ഹി മാര്‍ത്തോമ രൂപത വികാരി ജനറാള്‍ ഫാ.സി.എ. വര്‍ഗീസ്, എസ്എബിഎസ് സത്ന പ്രൊവിന്‍ഷ്യല്‍ സുപ്പീരിയര്‍ സിസ്റര്‍ ആല്‍ഫി കല്ലിങ്കല്‍, രൂപതയിലെ ആദ്യ വൈദികന്‍ ഫാ. ജോബ് വള്ളിയനാല്‍, സത്ന ഇടവകയിലെ പാരിഷ് കൌണ്‍സില്‍ സെക്രട്ടറി നിയൂസ് ടോപ്പോ, ഫാ.പോള്‍ ഉത്തനിപറമ്പന്‍ എന്നിവര്‍ പ്രസംഗിക്കും. മാര്‍ ജോസഫ് കൊടകല്ലില്‍ മറുപടി പ്രസംഗം നടത്തും.
സത്ന രൂപതയിലെ വൈദികര്‍, സന്യസ്തര്‍, വിശ്വാസികള്‍ എന്നിവര്‍ക്കൊപ്പം കോതമംഗലം രൂപത പ്രതിനിധികള്‍, നിയുക്ത മെത്രാന്റെ കുടുംബാംഗങ്ങള്‍ എന്നിവരും മെത്രാഭിഷേക ശുശ്രൂഷകളില്‍ പങ്കെടുക്കാന്‍ എത്തിയിട്ടുണ്ട്.
കോതമംഗലം രൂപതയിലെ പോത്താനിക്കാട് ഇടവകയിലാണ് 1965 ഡിസംബര്‍ 18ന് നിയുക്ത ഇടയന്റെ ജനനം. കൊടകല്ലില്‍ പരേതനായ ജോണും മറിയക്കുട്ടിയുമാണു മാതാപിതാക്കള്‍. കോതമംഗലം രൂപതയിലെ വാഴക്കുളം ഫൊറോന വികാരി ഫാ.കുര്യാക്കോസ് കൊടകല്ലില്‍ നിയുക്ത മെത്രാന്റെ സഹോദരനാണ്. ബേബി (റിട്ട. പോലീസ് സബ് ഇന്‍സ്പെക്ടര്‍), ഡോളി മാത്യു (തൈലംമാനായില്‍, മുരിക്കാശേരി), സോണി (ഇംഗ്ളണ്ട്) എന്നിവരാണു മറ്റു സഹോദരങ്ങള്‍. നിയുക്തമെത്രാന്റെ കുടുംബാംഗങ്ങള്‍ ഇപ്പോള്‍ കോതമംഗലം മലയന്‍കീഴിലാണു താമസം.
Source:Deepika
