News >> ലോകയുവജന മേള റെജിസ്ട്രേഷന്‍ ആരംഭിച്ചു
ജൂലൈ 26-ാം തിയതി ഞായറാഴ്ച വത്തിക്കാനില്‍ നടന്ന ത്രികാല പ്രാര്‍ത്ഥനാ പ്രഭാഷണത്തിന്‍റെ അന്ത്യത്തിലാണ് പോളണ്ടിലെ ക്രാക്കോയില്‍ 2016 ജൂലൈ 21-മുതല്‍ 31-വരെ അരങ്ങേറുന്ന മേളയുടെ റെജിസ്ട്രേഷന്‍ പാപ്പാ ഫ്രാന്‍സിസ് ഉത്ഘാടനംചെയ്തത്. പ്രതീകാത്മകമായി ഇന്‍റെര്‍നെറ്റിലൂടെ തന്‍റെ പേര് ആദ്യം റെജിസ്റ്റര്‍ ചെയ്തുകൊണ്ട് മേളയുടെ ഔദ്യോഗിക ബുക്കിംഗ്, അല്ലെങ്കില്‍ റജീസ്ട്രേഷന്‍ ഉത്ഘാടനം ചെയ്യപ്പെടുകയാണെന്ന് പാപ്പാ പ്രഖ്യാപിച്ചു.
31-ാമത് ലോക യുവജന മേളയുടെ സന്നദ്ധസേവകരായ രണ്ടുപേരുടെ - ഒരു പോളണ്ടുകാരി യുവതിയുടെയും ഇറ്റലിക്കാരന്‍ യുവാവിന്‍റെയും- സാന്നിദ്ധ്യത്തിലാണ് പാപ്പാ പ്രതീകാത്മകമായ ഉത്ഘാടനം നിര്‍വ്വഹിച്ചത്. മേളയുടെ ഔദ്യോഗിക ചിഹ്നമുള്ള ടി-ഷേര്‍ട്ട് അണിഞ്ഞ് സന്നിഹിതരായിരുന്ന യുവാവും യുവതിയും ചത്വരത്തിലെ വന്‍ജനക്കൂട്ടത്തോടു ചേര്‍ന്ന് പാപ്പായുടെ പ്രതീകാത്മകമായ റെജിസ്ട്രേഷന്‍ അംഗീകരിച്ചുകൊണ്ട് ഹസ്താരവും മുഴക്കി. യുവജനമേളയ്ക്ക് അഭിവാദ്യങ്ങള്‍ അര്‍പ്പിച്ചു.ആഗോളസഭ ആചരിക്കുന്ന 'കാരുണ്യത്തിന്‍റെ വിശുദ്ധ വത്സര'ത്തില്‍ തന്നെയാണ് യുവജന മഹോത്സവവും അരങ്ങേറുന്നത്. 'കരുണയുള്ളവര്‍ അനുഗ്രഹീതരാകുന്നു
, എന്തെന്നാല്‍ അവര്‍ക്ക് കരുണ ലഭിക്കും', (മത്തായി 5,7), എന്ന സുവിശേഷ സൂക്തം ആപ്തവാക്യമാക്കിക്കൊണ്ടാണ് യുവജനങ്ങള്‍ പോളണ്ടിലെ ക്രാക്കോയില്‍ സംഗമിക്കുവാന്‍ പോകുന്നത്. ആചരിക്കാന്‍ ഒരുങ്ങുന്ന യുവജനോത്സവം ദൈവികകാരുണ്യത്തിന്‍റെ ജൂബിലിയാവട്ടെ, മഹോത്സവമാവട്ടെ എന്ന് പാപ്പാ ആശംസിച്ചു. ഒപ്പം ലോകയുവതയെ ആ മഹാസംഗമത്തിലേയ്ക്ക് ക്ഷണിക്കുകയും, പങ്കെടുക്കുന്ന സകലര്‍ക്കും അവരുടെ സമൂഹങ്ങള്‍ക്കും കൃപയുടെയും അനുഗ്രഹത്തിന്‍റെയും അവസരമാവട്ടെ, എന്ന് പാപ്പാ ആശംസിക്കുകയും ചെയ്തു. (Source : Vatican Radio)
