News >> കേരളത്തിന്റെ മദ്യനയം മറ്റു സംസ്ഥാനങ്ങളും പിന്തുടരണം: ഗവര്‍ണര്‍
തിരുവനന്തപുരം: കേരളത്തില്‍ സര്‍ക്കാര്‍ നടപ്പാക്കിയ മദ്യനയം മറ്റുസംസ്ഥാനങ്ങളും പിന്തുടരണമെന്നു ഗവര്‍ണര്‍ ജസ്റീസ് പി സദാശിവം. മൂന്ന് ദിവസങ്ങളിലായി തിരുവനന്തപുരത്ത് നടന്ന പ്രഥമ അന്താരാഷ്ട്ര സമ്മേളനം 'സുബോധം ഐക്കണ്‍ 2016' സമാപന സമ്മേളനം ഉദ്ഘാടനം ചെയ്യുകയായിരുന്നു ഗവര്‍ണര്‍. അയല്‍സംസ്ഥാനമായ തമിഴ്നാടിനോടും മദ്യനയത്തില്‍ കേരളമാതൃക പിന്തുടരാനാണു താന്‍ നിര്‍ദേശിച്ചതെന്ന് അദ്ദേഹം പറഞ്ഞു. 1986ല്‍ മദ്യം ഉപയോഗിക്കുന്നവരുടെ ശരാശരി പ്രായം 19 വയസായിരുന്നു. എന്നാല്‍, അത് രണ്ടായിരമായപ്പോള്‍ 13.5 വയസായി കുറഞ്ഞു. ഈ ദുരന്തം മുന്നില്‍കണ്ടാണ് കേരളത്തില്‍ സുബോധം പദ്ധതി ആരംഭിച്ചത്. 2030 ഓടെ പൂര്‍ണമദ്യ വിമുക്ത കേരളം യാഥാര്‍ഥ്യമാക്കി പുനര്‍ജനി പദ്ധതി ആവിഷ്കരിക്കും.
സംസ്ഥാനത്ത് മദ്യ ഉപഭോഗം 20.27 ശതമാനം കുറഞ്ഞെങ്കിലും മയക്കുമരുന്നിന്റെയും മറ്റു ലഹരി പദാര്‍ഥങ്ങളുടെയും ഉപയോഗം വര്‍ധിച്ചു. സ്കൂള്‍തലം മുതല്‍ ബോധവത്കരണം നടത്തി ലഹരി ഉപയോഗത്തിന്റെ ദൂഷ്യവശങ്ങള്‍ വിവരിക്കുന്ന ലഘുലേഖകള്‍ പ്രാദേശിക ഭാഷയില്‍ അച്ചടിച്ച് വിതരണം ചെയ്യണം. കേരളത്തില്‍ ചുരുങ്ങിയ സമയത്തിനുള്ളില്‍ ലഹരിഉപയോഗം ഗണ്യമായി കുറഞ്ഞത് സംസ്ഥാനത്തിന്റെ പ്രതികരണശേഷിയും അവബോധവുമാണ് വെളിപ്പെടുത്തുന്നതെന്നും ഗവര്‍ണര്‍ പറഞ്ഞു.
Source: Deepika
